തിരുവനന്തപുരം: ഭൂമി തരം മാറ്റ അപേക്ഷകള് വേഗത്തില് തീർപ്പാക്കുന്നതിനായി രണ്ടാം ഘട്ട അദാലത്ത് നടത്തുന്നതിന് റവന്യൂ സെക്രട്ടേറിയറ്റ് യോഗം തീരുമാനിച്ചതായി റവന്യൂ മന്ത്രി കെ.രാജൻ അറിയിച്ചു. ഒക്ടോബർ 25 മുതല് നവംബർ 15 വരെ താലൂക്ക് തലത്തിലാണ് അദാലത്ത് സംഘടിപ്പിക്കുക.
ഒക്ടോബർ 25 ന് സംസ്ഥാന തല ഉദ്ഘാടനം നടക്കും. ഓരോ താലൂക്കിലേയു സമയ ക്രമം നിശ്ചയിക്കുന്നതിന് ലാൻറ് റവന്യൂ കമ്മീഷണറെ ചുമതലപ്പെടുത്തി. 25 സെൻറില് താഴെയുള്ള സൗജന്യമായി തരം മാറ്റത്തിന് അർഹതയുള്ള ഫോം5, ഫോം 6 അപേക്ഷകളാണ് അദാലത്തില് പരിഗണിക്കുന്നത്. ഇപ്രകാരം അപേക്ഷകള് പോർട്ടലില് സജ്ജീകരിക്കുന്നതിനായി സംസ്ഥാന ഐടി സെല്ലിന് നിർദ്ദേശം നല്കി.
ജില്ലാ കളക്ടർമാരുടെ മേല്നോട്ടത്തിലാണ് അദാലത്തുകള് സംഘടിപ്പിക്കുക. അദാലത്തില് പരിഗണിക്കുന്ന അപേക്ഷകർക്കുള്ള അറിയിപ്പ് അപേക്ഷയില് രേഖപ്പെടുത്തിയ മൊബൈല് നമ്പറിലേക്ക് പ്രത്യേക സന്ദേശം അയക്കുവാൻ നിർദ്ദേശം നല്കിയാതായി മന്ത്രി അറിയിച്ചു.
TAGS : LAND | KERALA
SUMMARY : Land Type Change Adalat from October 25 to November 15
