കൊച്ചി: കൊച്ചി ബോള്ഗാട്ടി പാലസില് കഴിഞ്ഞ ദിവസം നടന്ന ലോകപ്രസിദ്ധ സംഗീതജ്ഞൻ ഡി.ജെ. അലൻ വാക്കറുടെ സംഗീതനിശയ്ക്കിടെ കൂട്ട മൊബൈൽ ഫോൺ മോഷണം. 21 ഐ ഫോണുകള് ഉള്പ്പെടെ 34 സ്മാര്ട്ട് ഫോണുകള് നഷ്ടമായെന്നാണ് മുളവുകാട് പോലീസിന് പരാതി ലഭിച്ചത്. കേസ് അന്വേഷിക്കാന് പ്രത്യേക സംഘത്തെ രൂപികരിച്ചു.
മോഷ്ടാക്കള് സംസ്ഥാനം വിട്ടതായാണ് വിവരം. വിഐപി ടിക്കറ്റില് അകത്ത് കടന്ന 8 അംഗ സംഘമാണ് മൊബൈല് മോഷ്ടിച്ചതെന്നും കണ്ടെത്തിയിട്ടുണ്ട്. ബെംഗളൂരുവിലും ഗോവയിലും മറ്റും സമാനമായി പയറ്റിത്തെളിഞ്ഞ കള്ളന്മാരാണ് ഇവരെന്നാണ് പോലീസ് അനുമാനം. കഴിഞ്ഞ വർഷം ഒക്ടോബർ മുതൽ ഇക്കഴിഞ്ഞ സെപ്തംബർ 21 വരെ രാജ്യത്തിന്റെ വിവിധ ഭാഗങ്ങളിൽ സംഗീതനിശകൾക്കിടെ മൊബൈൽ ഫോണുകൾ മോഷ്ടിക്കപ്പെട്ടിരുന്നു.
ഇതിനിടെ മോഷണം പോയ ഒരു ഐ ഫോണിന്റെ ലൊക്കേഷൻ സാങ്കേതിക സഹായത്തോടെ നെടുമ്പാശേരിയിൽ കണ്ടെത്തി. പോലീസ് എത്തിയപ്പോഴേക്കും ലൊക്കേഷൻ മുംബൈ ആയി. പ്രതികൾ വിമാനമാർഗം മടങ്ങിയെന്നാണ് കരുതുന്നത്. ഒരാൾ മോഷ്ടിക്കുകയും നിമിഷങ്ങൾക്കകം കൈമാറ്റം ചെയ്യുന്നതുമാണ് ഇവരുടെ രീതിയെന്ന് പോലീസ് പറയുന്നു.
നൂറോളം പോലീസ് ഉദ്യോഗസ്ഥരെയാണ് കൊച്ചിയില് സംഗീതനിശയുടെ സുരക്ഷാചുമതലയ്ക്കായി വിന്യസിച്ചിരുന്നത്. പ്രതികളെ പിടികൂടേണ്ടത് പോലീസിന്റെ അഭിമാന പ്രശ്നം കൂടിയാണ്. സിസിടിവി കേന്ദ്രികരിച്ച് അന്വേഷണം നടക്കുന്നുവെന്നും പോലീസ് അറിയിച്ചു.
പരിപാടിക്കിടെ മന:പൂര്വം തിക്കും തിരക്കുമുണ്ടാക്കിയാണ് മോഷണം നടന്നത്. പോലീസ് സുരക്ഷയ്ക്കൊപ്പം തന്നെ സംഘാടകര് ഒരുക്കിയ സുരക്ഷാസംഘവും സംഗീതനിശയ്ക്കുണ്ടായിരുന്നു. ഞായറാഴ്ച വൈകിട്ടാണ് സണ് ബേണ് അറീന ഫീറ്റ് അലന് വാക്കര് സംഗീതനിശ അരങ്ങേറിയത്. വാക്കര് വേള്ഡ് എന്ന പേരില് അലന് വാക്കര് രാജ്യത്തുടനീളം 10 നഗരങ്ങളില് നടത്തുന്ന സംഗീത പരിപാടിയിലൊന്നായിരുന്നു ഇത്.
<BR>
TAGS : MOBILE PHONE THEFT | KERALA POLICE
SUMMARY : 34 mobile phones including 21 iPhones were stolen during the music night; Special Investigation Team
