കോട്ടയം: എ.ഡി.എം നവീൻ ബാബുവിന്റെ മരണത്തിൽ കണ്ണൂർ ജില്ല പഞ്ചായത്ത് പ്രസിഡന്റ് പി.പി. ദിവ്യയ്ക്ക് വീഴ്ച പറ്റിയതായി സി.പി.എം കേന്ദ്ര കമ്മിറ്റിയംഗം പി.കെ. ശ്രീമതി. എ.ഡി.എമ്മിന്റെ യാത്രയയപ്പ് വേദിയിൽ പോയി ദിവ്യ അത്തരത്തിൽ പരാമർശം നടത്തേണ്ടിയിരുന്നില്ലെന്നും അവർ കോട്ടയത്ത് മാധ്യമപ്രവർത്തകരോട് പറഞ്ഞു. നവീന്റെ യാത്രയയപ്പ് ദിവസം നടത്തിയ അഴിമതി ആരോപണം സന്ദർഭോചിതമായിരുന്നില്ല എന്നും അങ്ങനെയൊരു വേദിയിൽ പറയേണ്ട കാര്യമല്ലായിരുന്നു അതെന്നും അവർ പറഞ്ഞു.
വീഴ്ച ഉണ്ടായാൽ മൂകമായി ഇരിക്കുന്ന പാർട്ടി അല്ല സിപിഎം. മരണത്തിനു മറ്റു കാരണങ്ങൾ ഉണ്ടോ എന്നുകൂടി പരിശോധിക്കട്ടെ. അന്വേഷിക്കുമ്പോൾ എല്ലാം മനസിലാകും. പി പി ദിവ്യയുടെ ഭർത്താവിന്റേതാണ് പെട്രോൾ പമ്പ് എന്നത് ഉറപ്പില്ലാത്ത ആരോപണമാണെന്നും പി കെ ശ്രീമതി കൂട്ടിച്ചേർത്തു
ചൊവ്വാഴ്ച രാവിലെയാണ് കണ്ണൂർ എ.ഡി.എം കെ. നവീൻ ബാബുവിനെ പള്ളിക്കുന്നിലെ കോർട്ടേഴ്സിൽ മരിച്ച നിലയിൽ കണ്ടെത്തിയത്. കണ്ണൂരിൽ നിന്ന് സ്വദേശമായ പത്തനംതിട്ടയിലേക്ക് സ്ഥലംമാറ്റം ലഭിച്ച നവീൻ ബാബുവിന് കണ്ണൂർ കലക്ടറേറ്റ് കോൺഫറൻസ് ഹാളിൽ യാത്രയയപ്പ് നൽകിയിരുന്നു. ഈ ചടങ്ങിൽ ജില്ലാ പഞ്ചായത്ത് പ്രസിഡന്റ് പി.പി. ദിവ്യ അഴിമതി ആരോപണം ഉന്നയിച്ചതിന് പിന്നാലെയാണ് നവീൻ ബാബുവിനെ മരിച്ച നിലയിൽ കണ്ടെത്തിയത്.
<br>
TAGS : ADM NAVEEN BABU
SUMMARY : P K Sreemathi on ADM’S Death
