ഡല്ഹി നഗരത്തില് കനത്ത മഴയില് ജനജീവിതം സ്തംഭിച്ചു. നഗരത്തിന്റെ പല ഭാഗങ്ങളിലും വെള്ളക്കെട്ടുള് രൂപപ്പെട്ടു. മഴയില് വ്യാപക നാശനഷ്ടമാണ് ഉണ്ടായിരിക്കുന്നത്. ഡൽഹിയിലെ പലയിടങ്ങളിലും രൂക്ഷമായ വെള്ളക്കെട്ടാണ് അനുഭവപ്പെടുന്നത്. കാറുകള് മുങ്ങുകയും വലിയ രീതിയിലുള്ള ഗതാഗതക്കുരുക്ക് ഉണ്ടാകുകയും ചെയ്തു. പല റോഡുകളിലും വാഹനങ്ങള് പകുതിയോളം വെള്ളത്തില് മുങ്ങിയിരിക്കുകയാണ്.
ഇതിനിടെ ശക്തമായ കാറ്റില് ഡൽഹി അന്താരാഷ്ട്ര വിമാനത്താവളത്തിലെ ടെര്മിനല് ഒന്നിലെ മേല്ക്കൂരയുടെ ഒരു ഭാഗം തകര്ന്ന് വീണു. അപകടത്തില് നാലു പേര്ക്ക് പരുക്കേറ്റു. നിരവധി വാഹനങ്ങള് അടിയില് കുടുങ്ങി. മേല്ക്കൂര തകര്ന്ന് വീണ് നിരവധി വാഹനങ്ങളും തകര്ന്നു. മൂന്ന് ഫയര് ഫോഴ്സ് യൂണിറ്റുകള് ഉടന് സ്ഥലത്തെത്തി രക്ഷാപ്രവര്ത്തനം നടത്തുകയായിരുന്നു.
ശക്തമായ മഴയില് നോയിഡ, ആര്.കെ പുരം, മോത്തിനഗര് തുടങ്ങിയ വിവിധ പ്രദേശങ്ങളില് വെള്ളം കയറി. അടുത്ത രണ്ട് മണിക്കൂറില് ഡൽഹിയില് ശക്തമായ മഴ തുടരുമെന്ന് കേന്ദ്ര കാലാവസ്ഥ വകുപ്പ് അറിയിച്ചു. ജാഗ്രത നടപടികള് സ്വീകരിക്കാനും നിര്ദേശം നല്കി.
TAGS : DELHI | RAIN
SUMMARY : Heavy rains in Delhi
