ബെംഗളൂരു: വൈദ്യുതി ലൈൻ പൊട്ടിവീണ കമ്പിവേലിയിൽ നിന്നും ഷോക്കേറ്റ് അഞ്ച് വയസുകാരൻ മരിച്ചു. തുമകുരു തുരുവേക്കരെ താലൂക്കിലെ ഗൊരഘട്ട ഗ്രാമത്തിലാണ് സംഭവം. പോഷക് ഷെട്ടി ആണ് മരിച്ചത്. ചാർജ് ചെയ്യുന്നതിനിടെ വൈദ്യുതി ലൈൻ പൊട്ടി കമ്പിവേലിയിൽ വീണിരുന്നു. ഇതോടെ വീടിന് പുറത്ത് കളിച്ചുകൊണ്ടിരുന്ന കുട്ടി അബദ്ധത്തിൽ കമ്പിവേലിയിൽ ചവിട്ടുകയായിരുന്നു.
ലൈൻ പൊട്ടിവീണെങ്കിലും വൈദ്യുതി ഓഫ് ആക്കിയിരുന്നില്ല. കുട്ടിയെ ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. രണ്ടു ദിവസം മുമ്പാണ് ലൈൻ പൊട്ടി വീണത്. നിരവധി തവണ പരാതിപ്പെട്ടിട്ടും ഇത് ശരിയാക്കാൻ ബെസ്കോം ഉദ്യോഗസ്ഥർ ശ്രമിച്ചില്ലെന്ന് കുട്ടിയുടെ രക്ഷിതാക്കൾ ആരോപിച്ചു. ബെസ്കോം ജീവനക്കാരുടെ അനാസ്ഥയാണ് കുട്ടിയുടെ മരണകാരണമെന്ന് മാതാപിതാക്കൾ ആരോപിച്ചു. സംഭവത്തിൽ ലോക്കൽ പോലീസ് കേസെടുത്തു.
TAGS: KARNATAKA | ELECTROCUTED
SUMMARY: 5-year-old boy playing outside house electrocuted to death
