തിരുവനന്തപുരം: കേരളത്തില് കാലവര്ഷം കൂടുതല് സജീവമാകുന്നു. വടക്കന് ജില്ലകളില് ഇന്ന് അതിശക്തമായ മഴയ്ക്ക് സാധ്യതയാണ് കാലാവസ്ഥാ കേന്ദ്രം പ്രവചിക്കുന്നത്. കണ്ണൂര്, കാസറഗോഡ് ജില്ലകളില് കേന്ദ്ര കാലാവസ്ഥ വകുപ്പ് ഓറഞ്ച് അലര്ട്ട് പ്രഖ്യാപിച്ചു. കടലില് പോകുന്നതിന് മത്സ്യത്തൊഴിലാളികള്ക്ക് കര്ശന വിലക്കേര്പ്പെടുത്തിയിട്ടുണ്ട്.
തെക്കന് മഹാരാഷ്ട്ര മുതല് വടക്കന് കേരള തീരം വരെ നിലനില്ക്കുന്ന ന്യൂനമര്ദ്ദ പാത്തിയാണ് ഇപ്പോഴുള്ള മഴയ്ക്ക് കാരണം. മഴക്കൊപ്പം ഇടിമിന്നലിനും ശക്തമായ കാറ്റിനും സാധ്യതയുണ്ട്. കണ്ണൂര്, കാസറഗോഡ് ജില്ലകളില് ഓറഞ്ച് അലേര്ട്ടും എറണാകുളം, ഇടുക്കി, തൃശ്ശൂര്, പാലക്കാട്, മലപ്പുറം, കോഴിക്കോട്, വയനാട് ജില്ലകളില് യെല്ലോ അലര്ട്ടും പ്രഖ്യാപിച്ചു.
