ബെംഗളൂരു: കനത്ത മഴ കാരണം ദക്ഷിണ കന്നഡ, ഉഡുപ്പി, കുടക് ജില്ലകളിൽ വിദ്യാഭ്യാസ സ്ഥാപനങ്ങൾക്ക് നാളെ അവധി പ്രഖ്യാപിച്ചു. ഇതേ ജില്ലകളിൽ അതിശക്തമായ മഴ തുടരുന്ന സാഹചര്യത്തിൽ കാലാവസ്ഥാ നിരീക്ഷണ കേന്ദ്രം അടുത്ത നാല് ദിവസത്തേക്ക് റെഡ് അലർട്ട് പ്രഖ്യാപിച്ചിട്ടുണ്ട്.
ദക്ഷിണ കന്നഡ, ഉഡുപ്പി, കുടക് ജില്ലകളിലെ അങ്കണവാടികൾക്കും സ്കൂളുകൾക്കും പിയു കോളേജുകൾക്കും അവധി ബാധകമാണ്. തിങ്കളാഴ്ച പ്രദേശത്ത് കനത്ത മഴ പെയ്തതിനെത്തുടർന്ന് പ്രദേശവാസികളോട് ജാഗ്രത പാലിക്കാനും ആവശ്യമായ മുൻകരുതലുകൾ സ്വീകരിക്കാനും ജില്ലാ ഭരണകൂടങ്ങൾ നിർദേശിച്ചു.
കേന്ദ്ര കാലാവസ്ഥാ വകുപ്പിന്റെ കണക്കനുസരിച്ച് ഉത്തര കന്നഡയിലെ കാസിൽ റോക്കിലാണ് ഞായറാഴ്ച ഏറ്റവും കൂടുതൽ മഴ ലഭിച്ചത്, 220 മില്ലിമീറ്റർ. ഉത്തര കന്നഡ ജില്ലയിൽ ജൂലൈ 16 ന് രാത്രി 8.30 വരെ കനത്ത മഴയ്ക്കു സാധ്യതയുള്ളതിനാൽ റെഡ് അലർട്ടിനും കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്. കർണാടക തീരപ്രദേശങ്ങളിൽ തിങ്കൾ, ചൊവ്വ ദിവസങ്ങളിൽ റെഡ് അലർട്ട് പ്രഖ്യാപിച്ചിട്ടുണ്ട്.
TAGS: KARNATAKA | RAIN UPDATES
SUMMARY: Heavy rainfall in DK, Udupi; DC declares holiday for schools, PU colleges on July 16
