പ്രണയാഭ്യർത്ഥന നിരസിച്ചതിനെ തുടർന്ന് 20-കാരിയെ കുത്തിക്കൊലപ്പെടുത്തി. കർണാടകയില് ഹുബ്ബള്ളി വീരപുരയിലാണ് ദാരുണസംഭവം. ഇന്ന് പുലർച്ചെയാണ് സംഭവം. വിദ്യാർഥിനിയായ അഞ്ജലിയെ ഗിരീഷ് സാവന്ത് എന്നയാള് വീട്ടില് അതിക്രമിച്ച് കയറി കുത്തികൊലപ്പെടുത്തുകയായിരുന്നു.
ഇയാളെ പിന്നീട് പോലീസ് പിടികൂടി. കഴിഞ്ഞ ദിവസം പ്രതി അഞ്ജലിയോട് പ്രണയാഭ്യർത്ഥന നടത്തിയിരുന്നു. എന്നാല് അഞ്ജലി ഇത് നിരസിച്ചു. ഇതിന് ശേഷം പ്രതി യുവതിയെ ശല്യപ്പെടുത്തിയിരുന്നുവെന്ന് പോലീസ് പറയുന്നു. വിദ്യാർഥിനിയുടെ ബന്ധുക്കള് വിഷയത്തില് ഇടപെടുകയും ശല്യം ചെയ്താല് പോലീസില് പരാതി നല്കുമെന്ന് മുന്നറിയിപ്പും നല്കിയിരുന്നു.
ഇതിന് പിന്നാലെയാണ് ഇന്ന് പുലർച്ചെ ക്രൂര കൊലപാതകം നടത്തിയത്. വീട്ടില് അതിക്രമിച്ച് കയറിയ പ്രതി ഉറങ്ങിക്കിടക്കുകയായിരുന്ന അഞ്ജലിയെ കുത്തിക്കൊലപ്പെടുത്തുകയായിരുന്നു. തടയാൻ ശ്രമിച്ച ബന്ധുക്കളെയും പ്രതി ആക്രമിച്ചു.
