ന്യൂഡല്ഹി: ഡൽഹിയിൽ ഉഷ്ണതരംഗം ആഞ്ഞടിക്കുന്നു. ഇന്ന് 44.4 ഡിഗ്രി സെൽഷ്യസാണ് ഡൽഹിയിലെ ഉയർന്ന താപനില. ഈ വർഷം രാജ്യതലസ്ഥാനത്ത് രേഖപ്പെടുത്തിയ ഏറ്റവും കൂടിയ അന്തരീക്ഷ താപനിലയാണിത്. ഉഷ്ണതരംഗം രൂക്ഷമായതോടെ ഡൽഹിയിൽ റെഡ് അലർട്ട് പ്രഖ്യാപിച്ചിരിക്കുകയാണ്.. ഉയര്ന്ന താപനില 45 ഡിഗ്രി വരെ ഉയരാമെന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. അടുത്ത ഏഴു ദിവസം കൂടി ഉയര്ന്ന താപനില തുടരുമെന്നും അറിയിച്ചിട്ടുണ്ട്.
ശനിയാഴ്ച ഡല്ഹിയിലെ 10 കേന്ദ്രങ്ങളില് 45 ഡിഗ്രി ചൂടാണ് രേഖപ്പെടുത്തിയത്. വടക്കുപടിഞ്ഞാറന് ഡല്ഹിയിലെ മുങ്കേഷ്പൂരിലാണ് ഉയര്ന്ന താപനില രേഖപ്പെടുത്തിയത്. 46.08 ഡിഗ്രി സെല്ഷ്യസ്. അടുത്ത ഒരാഴ്ച കൂടി കനത്ത ചൂട് തുടരുമെന്നും, ചിലയിടങ്ങളില് സാധാരണയില് നിന്നും ഒരു ഡിഗ്രി മുതല് രണ്ടു ഡിഗ്രി വരെ ചൂട് ഉയര്ന്നേക്കാമെന്നും കാലാവസ്ഥ വകുപ്പ് അറിയിച്ചു. ഡല്ഹിയില് തിങ്കളാഴ്ച മുതല് ബുധനാഴ്ച വരെ ഓറഞ്ച് അലര്ട്ട് പുറപ്പെടുവിച്ചിട്ടുണ്ട്. 25 മുതൽ 35 കിലോമീറ്റർ വരെ വേഗതയിൽ ശക്തമായ ഉപരിതല കാറ്റും ഭാഗികമായി മേഘാവൃതമായ ആകാശത്തിനും സാധ്യതയുണ്ടെന്ന് വകുപ്പ് പ്രവചിക്കുന്നു.
കാലാവസ്ഥാ ഉദ്യോഗസ്ഥർ ജാഗ്രത നിർദ്ദേശം പുറപ്പെടുവിച്ചിട്ടുണ്ട്. കുട്ടികൾ, പ്രായമായവർ, വിട്ടുമാറാത്ത രോഗങ്ങളുള്ളവർ എന്നിവരുൾപ്പെടെ “ദുർബലരായ ആളുകൾക്ക് അതീവ പരിചരണം” ഉറപ്പാക്കാൻ നിർദ്ദേശം പുറപ്പെടുവിച്ചിട്ടുണ്ട്. “ചൂട് എക്സ്പോഷർ ഒഴിവാക്കുക, തണുപ്പ് നിലനിർത്തുക. നിർജ്ജലീകരണം ഒഴിവാക്കുക.” എന്നും നിർദ്ദേശങ്ങളിൽ വ്യക്തമാക്കുന്നു.
