ബെംഗളൂരു: കർണാടകയിലെ സഹകരണ ബാങ്കുകളിലെ അഴിമതി അന്വേഷിക്കാൻ പ്രത്യേക അന്വേഷണ സംഘത്തെ (എസ്ഐടി) രൂപീകരിക്കുമെന്ന് ഉപമുഖ്യമന്ത്രി ഡി. കെ. ശിവകുമാർ അറിയിച്ചു. നഗരത്തിലെ ശ്രീ ഗുരു രാഘവേന്ദ്ര സഹകരണ ബാങ്ക്, സഹോദര സ്ഥാപനമായ ശ്രീ ഗുരു സാർവഭൗമ സൗഹാർദ ക്രെഡിറ്റ് കോഓപ്പറേറ്റീവ് ലിമിറ്റഡ്, ശ്രീ വസിസ്ത ക്രെഡിറ്റ് സൗഹാർദ സഹകാരി ലിമിറ്റഡ് എന്നിവയുമായി ബന്ധപ്പെട്ട സാമ്പത്തിക തട്ടിപ്പുകളെ കുറിച്ച് എസ്ഐടി വിശദമായി അന്വേഷിക്കും.
മൂന്ന് മാസത്തിനകം അന്വേഷണ റിപ്പോർട്ട് സമർപ്പിക്കാൻ എസ്ഐടി സംഘത്തോട് ആവശ്യപ്പെടുമെന്നും ശിവകുമാർ പറഞ്ഞു. തിരഞ്ഞെടുപ്പ് പ്രചാരണത്തിനായി കേരളത്തിലേക്ക് പോകുന്നതിന് മുമ്പ് ഒരു സംഘം നിക്ഷേപകർ കോൺഗ്രസ് ജനറൽ സെക്രട്ടറി പ്രിയങ്ക ഗാന്ധിയെ കാണുകയും നീതി ആവശ്യപ്പെട്ട് നിവേദനം നൽകുകയും ചെയ്തുവെന്ന് ശിവകുമാർ പറഞ്ഞു. മൂന്ന് ലക്ഷം നിക്ഷേപകരാണ് സംസ്ഥാനത്ത് ദുരിതം അനുഭവിക്കുന്നത്. ഇവരിൽ 300-ഓളം പേർ ഇതിനോടകം മരണപ്പെട്ടു. ശേഷിക്കുന്നവർക്ക് നീതി നേടിക്കൊടുക്കാൻ സർക്കാർ പ്രതിജ്ഞാബദ്ധരാണെന്ന് അദ്ദേഹം വ്യക്തമാക്കി.
