കൊച്ചി: കലൂർ സ്റ്റേഡിയത്തിലെ നൃത്ത പരിപാടിക്കിടെ വിഐപി ഗ്യാലറിയില് നിന്ന് വീണ് പരുക്കേറ്റ ഉമ തോമസ് എംഎല്എയുടെ ആരോഗ്യ നിലയില് നേരിയ പുരോഗതി. അപകടനില തരണം ചെയ്തുവെന്ന് പറയാറായിട്ടില്ല. നേരത്തെയുണ്ടായിരുന്ന ആരോഗ്യനിലയില് അല്പം പുരോഗതിയുണ്ട്. എംഎല്എ വെന്റിലേറ്ററില് തുടരുമെന്നാണ് പുറത്തുവന്ന മെഡിക്കല് ബുള്ളറ്റിൻ.
തലയ്ക്കേറ്റ പരുക്ക് കൂടുതല് ഗുരുതരാവസ്ഥയിലായിട്ടുണ്ട്. ആന്തരിക രക്തസ്രാവം വർധിച്ചിട്ടില്ല. ശ്വാസകോശത്തിലെ ചതവുകള് അല്പം കൂടിയിട്ടുണ്ട്. ശ്വാസകോശത്തിനേറ്റ ഗുരുതരമായ ചതവുകാരണം കുറച്ചു ദിവസം കൂടി വെന്റിലേറ്ററില് തുടരേണ്ടതുണ്ട്. ശ്വാസകോശത്തിന്റെ ചതവിനായി ആന്റിബയോട്ടിക്കുകള് ഉൾപ്പെടെയുള്ള ചികിത്സകളാണ് ഇപ്പോള് നല്കുന്നതെന്ന് ആശുപത്രി പുറത്തിറക്കിയ മെഡിക്കല് ബുള്ളനില് വ്യക്തമാക്കുന്നു.
ഉമ തോമസിന്റെ ആരോഗ്യനില അല്പ്പം മെച്ചപ്പെട്ടിട്ടുണ്ടെന്ന് മന്ത്രി പി.രാജീവ് പറഞ്ഞു. ആശുപത്രിയിലേക്ക് കൊണ്ടുവന്നതിനേക്കാളും മെച്ചപ്പെട്ട സ്ഥിതിയിലാണ് ഇപ്പോഴുള്ളത്. ഒരു ശസ്ത്രക്രിയ വേണ്ടതില്ലെന്ന നിലപാടിലാണ് ഡോക്ടർമാരുടെ സംഘം. അഞ്ചംഗ വിദഗ്ധ സംഘം നിരീക്ഷണം തുടരുന്നുണ്ടെന്ന് ആശുപത്രിയിലെ ഡോക്ടർമാരുടെ സംഘത്തോട് സംസാരിച്ച ശേഷം മാധ്യമങ്ങളോട് മന്ത്രി പറഞ്ഞു.
Slight improvement in Uma Thomas’s health condition
